«Թուրքիան բազմաթիվ թշնամական գործողություններ է իրականացնում Հայաստանի դեմ»

Print Print Email Email

Մեծամոր ԱԷԿԻսկ Հայաստանը առաջարկում է Թուրքիային մասնակցել իր թիվ 1 ռազմավարական օբյեկտի շինարարությանը

Միջազգային պրակտիկայում աննախադեպ է, որ միմյանց հետ դիվանագիտական հարաբերություններ չունեցող երկրները միասին անվտանգության հարց լուծեն: Այս մասին մեզ հետ զրույցում ասաց քաղաքագիտության դոկտոր Լևոն Շիրինյանը` մեկնաբանելով այն տեղեկությունները, թե վարչապետ Տիգրան Սարգսյանը առաջարկել է Թուրքիային մասնակցել Հայաստանի նոր ատոմակայանի կառուցմանը:

«Նախ, անվտանգության հարց կա: Տեխնոլոգիաները յուրացնելու հարցեր կան: Որպես ատոմային էներգիայի երկիր` գուցե ունենք բաներ, որ օտարները, առավել ևս թուրքերը չպիտի իմանան»,- նշեց Լ. Շիրինյանը:

Հայաստանի վարչապետի վերոնշյալ առաջարկին է անդրադարձել նաև «Արարատ» ռազմավարագիտական կենտրոնի տնօրեն, քաղաքագիտության դոկտոր Արմեն Այվազյանը: Նա ևս անընդունելի է համարում Թուրքիայի մասնակցությունը Հայաստանի ատոմակայանի կառուցմանը: « Հայաստանի` անկախություն ձեռք բերելուց ի վեր, Թուրքիան մինչև այսօր Հայաստանի և ամբողջ հայության դեմ իրականացնում է բազմաթիվ թշնամական, ագրեսիվ, վնասարար գործողություններ»,- ասաց Ա. Այվազյանն օրերս լրագրողների հետ կայացած հանդիպման ժամանակ:

Նա այդ գործողությունները դասակարգեց տասը մակարդակի` իրավաքաղաքական, քաղաքական, ռազմական, տնտեսական, միջազգային իրավունքի, հասկացությունների ու տերմինաբանության, հոգեբանական ու տեղեկատվական պատերազմի և այլն, ինչպես նաև` 53 ենթամակարդակի:

«Այսինքն` ունենք տասը հիմնական ճակատ, որտեղ Թուրքիան մեր դեմ պատերազմ է մղում, և պարտադիր չէ, որ պատերազմ մղի հենց ռազմական միջոցներով: Պատերազմները այսօր, ինչպես և անցյալում, շահել են հաճախ ոչ թե միայն ռազմական ճանապարհով, այլ նախ և առաջ` տեղեկատվական, հոգեբանական, տնտեսական և այլ ոչ ուժային միջոցներով»,- նշեց «Արարատ» կենտրոնի տնօրենը:

Նա մեջբերեց օրերս Թուրքիայի վարչապետ Էրդողանի ասած խոսքերը, համաձայն որոնց` Թուրքիան Սդրբեջանի հետ միասին է մշակել և իրականացնում Արցախի հարցում քաղաքականությունը, և որ այդ հարցում իրենց դիրքորոշումներում որևէ տարբերություն չկա: Անդրադառնալով այն հայտարարություններին, թե «հայ-թուրքական հարաբերությունների մեջ դրական շարժ է տեղի ունեցել»` Ա. Այվազյանն ասաց. «Ո՞րն է այդ շարժը: Շրջափակումն էլ է շարունակվում, տեղեկատվական պատերազմն էլ է շարունակվում: Շարունակվում են նաև օժանդակությունն Ադ‎րբեջանին, հայ ժողովրդի պատմության կեղծարարությունը միջազգային ասպարեզում, տարբեր երկրներում հայերի դեմ տրամադրություններ լարելը, թուրքական քոլեջների միջոցով ադրբեջանա-թուրքական տեսակետների քարոզչությունը»:

Քաղաքագետը տարակուսանք հայտնեց այսքանից հետո այն առաջարկության առթիվ, որ Թուրքիան կարող է մասնակցել Հայաստանի ատոմակայանի կառուցմանը, այսինքն` երկրի ազգային անվտանգության համար արմատական նշանակություն ունեցող խնդրին: Ըստ նրա` այդ առաջարկությունը կարող է լինել զոնդաժ՝ հետախուզում, որի նպատակն է ստուգել «Թուրքիայի թշնամական քաղաքականության նկատմամբ հայ հասարակության» ընկալունակության անկման աստիճանը:

Իսկ քաղաքագետ Լ. Շիրինյանի համոզմամբ` եթե, այնուամենայնիվ, հանկարծ այդ համագործակցությունը տեղի ունենա, ապա, բացի անվտանգության խնդիրներից` կառաջանա մեկ այլ վտանգ ևս. դրանով «մենք նպաստելու ենք Արևմտյան Հայաստանը թուրքական տարրով բնակեցնելուն: Հայկական կողմը տասնյակ տարիներ չի ուզում հաշվի առնել, որ 17-րդ դարից թուրքերը Արևմտյան Հայաստանը ձգտում են բնակեցնել թուրքական էթնոսով: Ցեղասպանության միջոցով մաքրեցին մեր հայրենիքը հայկական տարրից և ստացան քրդերին, որոնք իրենց մրցակիցն են», օրինակ` ժողովրդագրական աճի տեմպերի տեսանկյունից:

«Արևմտյան Հայաստանի 1 քառ. կմ-ի վրա 10 անգամ ավելի քիչ մարդ է ապրում, քան Թուրքիայի արևմտյան զարգացած հատվածում: Եվ երկրորդ` քանի տարի է, Արևմտյան Հայաստանից կա արտագաղթ դեպի Արևմտյան Թուրքիա և երկրից դուրս»,- ասաց Լ. Շիրինյանը` հավելելով, որ թույլ տալով թուրքերին մասնակցել Հայաստանի ատոմակայանի կառուցմանը` «մենք կնպաստենք նրանց կողմից Արևմտյան Հայաստանի ավելի բարեհաջող յուրացմանը»:

Այս դեպքում, քաղաքագետի համոզմամբ, Թուրքիան էլեկտրական էներգիայի ներմուծումը կօգտագործի` Արևմտյան Հայաստանը թուրքերով բնակեցնելու համար, այսինքն` մի էթնոսով, «որը մեզ չի ընդ‎ունում»: Թուրքիայի արևմտյան շրջաններից շարժ կսկսվի դեպի արևելյան շրջաններ` Արևմտյան Հայաստան:

«Ինչքան էլ ասեն, որ թուրքերը քաղաքակրթվել են, հայ հասարակությունը պետք է իմանա, որ էթնոսները հազարամյակների մեջ են փոխվում. այդ փոփոխությունը շատ դժվար է տեղի ունենում: Թուրքական պետության արտաքին դրսևորումն ուրիշ է: Թուրքիայի իրական տերը «խորքային պետություն» կոչված կառույցն է, գեներալիտետի Թուրքիան` իսկական Թուրքիան»,- ասաց Լ. Շիրինյանը:

Օրինակ բերելով քրդական խնդիրը` քաղաքագետը նշեց, որ «Թուրքիան ճաքված, պառակտված երկիր է` ԽՍՀՄ-ի նման, որտեղ տարբեր էթնոսներ իրար հետ լավ հարաբերությունների մեջ չեն: Այն իր արտաքին քաղաքականության մեջ անկայուն երկիր է, իսկ անվտանգության մեջ, մեղմ ասած` քիչ կանխատեսելի: Էլ չեմ խոսում թուրանական ծրագրերի մասին»:

Լ. Շիրինյանը նշեց, որ վարչապետը փաստարկում է, թե Թուրքիան հարևան երկիր է: Քաղաքագետն ասաց, որ Իրանը «շատ ավելի հարևան երկիր է», որը նաև ատոմային էներգիայի բնագավառում փորձ ունի:

Սոնա Ավագյան

One response so far

One Response to “«Թուրքիան բազմաթիվ թշնամական գործողություններ է իրականացնում Հայաստանի դեմ»”

  1. Stephen T. Dulgarianon 11 Jul 2009 at 10:05 pm

    The Armenian Government should not open the borders with Turkey until they recognize the Armenian Genocide and make reparations and land returns to the Armenian Nation. Too much products are already coming into Armenia from Georgia and this must stop. By opening the borders with Turkey, only the Turks will benefit. Armenia has little too offer. We must put our trusts with the Russians, since they are guarding our borders with Armenian troops. Also, we must also put our trust with Iran since Gas pipelines are coming from them as well as many other products. Armenia must get the Textile Mills & Shoe Factories back into operation so that more Armenians do not leave the country for jobs.

Comments RSS

Leave a Reply

Կայքի մոդերատորներն իրավունք ունեն հեռացնելու այն գրառումները, որոնք պարունակում են անձնական վիրավորանքներ, բռնության կոչեր, թեմայից դուրս գրառումներ, գովազդային նյութեր։ Նաև չի խրախուսվում շատախոսությունը (flood):

You must be logged in to post a comment.